కవితాంధ్ర

మనసా !
ఎందుకే అంత దిగులు
మంటలు అంటించుకొని
పొగలు సెగలు
రెప్ప పాటు జీవితానికి 
ఎందుకే
ఇన్నిన్ని వగలు
ఈ పరుగులు //

మల్లెపువ్వు నడుగు
తన జీవన గమన మేమిటో
సన్నజాజి నడుగు
తన గమ్యమేమిటో
పరిమళాలు వెదజల్లే
పరమార్ధ మేమిటో

తన కోసమే కాదు ఒక రోజైనా
పరుల కొరకు బ్రతకాలని //

ఎన్నాళ్ళున్నావని కాదు
ఎంత సంపాదించావని కాదు
ఎందరి కనులలో
దీపాలు వెలిగించావని
ఎందరి హృదయాలలో
నిలిఛి పోయావని

మనిషి జన్మ అపురూపం
మరి ఏల ఈ పరితాపం
ఇలపై ఏ ఘన కార్యాలు సాధించావని//