కవితాంధ్ర

మొలకెత్తిన విత్తనం
తల ఎత్తి అడిగింది ఆకాశాన్ని
తానీ అవనిపైన
ఏ ఏ అద్భుతాలు చేయాలని
ఎన్నిఆకలిగొన్న ప్రాణులకు ఊపిరులూదాలని

పీఠమెక్కిన పెత్తనం
మోర ఎత్తి అడిగింది నా దేశాన్ని
తన పదవీ కాలాన
ఏ ఏ స్కాముల్లో పాల్గొనాలని
ఎన్ని హరితవనాలను ఆరగించాలని

జాతి ఎగరేసిన పతాకం
జాలిగా చూచింది నా ఆగ్రహావేశాన్ని
బేలగా అడిగింది

ఏ ఘనత ఆశించి
తానింకా ఎగరాలని
ఏ గొప్ప సందేశాలు
జగతికి అందించాలని
ఏ జాతి ఘన కీర్తి ఎలుగెత్తి చాటాలని