కవితాంధ్ర

’తలనిండ పూదండ దాల్చిన రాణి
మొలక నవ్వులతోటి మురిపించబోకె ‘’
ఆ పాట నీకు ఎంతో ఇష్టం కదా
అయితే దానిని అన్వయిస్తూ ఒక కవిత వినిపించు
అని ఆమె అడిగినదే తడవుగా ఉప్పొంగి ఉరికిన కవిత 
---------
తెలతెల వారకముందే
తీగ సింగారించుకుంది
తన సిగపాయల నిండా
అందంగా పూలు తురుముకుంది
ఆదమరచి దరిచేరిన నన్ను చూచి
అల్లరిగా దోరగా నవ్వింది
తన్మయంతో తలమునకలౌతున్న
నాపై తన చూపుల పరిమళాలు చల్లింది

ఆ తన్మయంలో తల్లీనమై నేనుండగా
చిరునవ్వుతో నువ్వొచ్చావు
తీగనడుము అల్లల్లాడగా
వయ్యారంగా నడిచొచ్చ్చావు
వింతగా కవ్వింతగా నన్ను చూచి
ముసిముసిగా నవ్వావు
పూల తీగ నడిగి
కొన్ని పూవులు తుంచి
తలలో తురుముకున్నావు
సమ్మోహనంగా నా వైపు చూచావు

‘’’తలనిండ పూదండ దాల్చిన రాణి
మొలక నవ్వులతోటి మురిపించ బోకే ‘’’
దూర తీరాలనుంచి ఘంటసాల పాట వినిపిస్తున్నది
నాతో పాటు మైమరచిన తోట ఆపాట వింటు
ఆశ్చర్యంగా నిన్ను నన్ను చూస్తున్నది