కవితాంధ్ర

కవి సమ్మేళనం
-----------------
అదొక సాహిత్య సభ
కవులు రచయితల కోలాహలం
సంకుల సమరానికి సన్నద్ధ మైనట్టుంది 
అక్కడి వాతావరణం

అందరి చేతుల్లో కవితాయుధాలు
ప్రతి ఒక్కరి హృదయంలో
వైషమ్యాలు ఈ ర్ష్యా ద్వేషాలు
పేజీల కొద్ది కవితలు చదవాలని పోటా పోటీలు
ఎవరి కవిత వారు చదివి అదే పోతగా పయనాలు

వేదిక పైన ఉన్న వారు మాత్రం దాతల పొగడ్తల్లో
స్వడబ్బా -పరడబ్బా - పరస్పర డబ్బా (ముళ్ళపూడి వారన్నట్టు )
వారు, వారి కోసం ఏర్పాటు చేసుకున్న వేదిక అది
తమ కీర్తిని కవులంతా గానం చెయ్యాలని
సుందరంగా నిర్మించుకొన్న సభా మందిర మది

కవులు -కవితలు కాదని పాఠాలు చదివారు
వార్తా పత్రికల లోని విషయాలు వల్లించారు

శాలువాలు దండలు పుష్పగుచ్చ్హాలు
ఫోటోలు వీడియోలు జాతర ముగిసింది
ఇదంతా హుళక్కి అని కళామతల్లి పెదవి విరిచింది

ఆహూతులైన శ్రోతల హృదయాల లో
ఇక ఈ సభలు బహిష్కరించి తీరాలని
ఒక మహత్తరమైన నిర్ణయం మెరిసింది--