కవితాంధ్ర

ఎందుకో ఈ మనిషి నిండుగా నవ్వడం లేదు
అందుకే ఏ మనిషి నాకు నచ్చడం లేదు

తన జీవితం అద్భుతమని ఆ దైవం ఇచ్చిన
అరుదైన అవకాశమని ఎవరు భావించడం లేదు

ఏమైందో ఏమో ఏ బాధలు వెంటాడుతున్నాయో
ఎదుటపడి ఎవరూ ధైర్యంగా మాటాడడం లేదు

తప్పు చేసినట్టు తక్కుతూ తారుతూ వున్నారే తప్ప
ఏ ఒక్కరు నిటారుగా నిర్భయంగా నడవడం లేదు

తాను నడిచే దారి మంచిది కాదని ఎంత చెప్పినా
అరిచి గీ పెట్టినా ఎవరు కొంచెమైనా మారడం లేదు

ఎన్ని నీతి శతకాలు ఎన్ని సుభాషితాలు ప్రవచనాలు
ఏకరవు పెట్టినా ఏ ఒక్కటి తన చెవి కెక్కడం లేదు