కవితాంధ్ర

ఒక వలపు గీతం 
------------------
ఎన్ని చిలిపిదనాలో 
ఆ నవ్వులలో ఉన్నాయి 
ఎన్ని పూలవనాలో 
ఆ పెదవులపై ఉన్నాయి 

ఎన్ని మౌనగీతాలో ఎన్నిపారిజాతాలో 
ఎన్ని మూగరాగాలో అన్నదిలే తొలిరేయి //

సిగ్గులు ఎదురైనాయి 
నడకలు బరువైనాయి 
మల్లెలు మరులైనాయి 
మాటలు కరువైనాయి 

అగరు పొగలు అత్తరులు వందిమాగధులైనాయి 
అన్ని -వంగి వంగి వందనాలు అంటున్నాయి //

ఆ చూపులలో సన్నాయి , 
మంగళ వాద్యాలున్నాయి 
ఊపిరిలో మందార మకరంద 
పోతన పద్యాలున్నాయి

ఒంగిన ఆ కనుదోయి ఆ ఓరచూపు లెవరికోసమోయి 
అది అరవిరిసిన మరుమల్లెల మందహాసమేనోయి //