కవితాంధ్ర

గాఢ నిద్రలో ఉన్నావు
మత్తుగా ఒత్తిగిలి పడుకున్నావు

అదను దొరికిందని
ముంగురులు నీ మోము పైన 
స్వైర విహారం చేస్తున్నాయి

నీ పెదవుల్ని కంటి రెప్పల్ని
చెంపల్ని చుబుకాన్ని
స్పర్సిస్తున్న ఆనందం లో ఉన్నాయి

నీ వదనం పైన
కూచిపూడి , భరతనాట్యం కలగలిపి
ఒకదాని వెంట ఒకటి ప్రదర్శిస్తున్నాయి

స్వేచ్చా వాగురులలో
స్వైర విహారం చేస్తున్న
ముంగురులతో మాటామాట కలిపాను
ఎంత ఆనందం
అదృష్టం అంటే మీదే అన్నాను

తదేకంగా చూస్తున్నాను
ముంగురుల విన్యాసం
అవి తాకినప్పుడల్లా ,
కలవరపాటున చిడిముడి చేసినప్పుడల్లా
నీ మోమున చెలరేగిన
మృదువైన కంపనం
మృదు లాస్యం చిరు స్పందనం
ముంగురులదే కదా అసలైన అదృష్టం అనిపించింది

అప్పుడప్పుడు
ముంగురుల నింగిలో
నువ్వూ విహరిస్తుంటావుగా !
మైమరచి పరవసిస్తావు కదా !!

కురులతొ చిలిపిగా
సయ్యటలాడుతున్న చిరుగాలి
రహస్యంగా నా చెవిలో అనడం వినిపించింది