నది పెదవిని తాకాలని
కడలికి ఆరాటం
కడలి కౌగిలి చేరాలని
సెలయేటికి ఉబలాటం
ఆ సంగమ భంగిమ చూడాలని
నింగికి నేలకు ఆర్భాటం //
గిరి శిఖరాలెన్ని ఎగిరి దూకిందో
జలపాతాలై జలకాలాడిందో
తరుశాఖల తలలెన్ని నిమిరిందో
మెలికలు తిరిగి అలుకలు పోయిందో
వేయి పాయలుగా మారినది
బడలి ఒడిలో చేరినది
కడకు అందుకున్నది
కడలి అభివందనం //
అలల కలలెన్ని ఆమనులైనాయో
అరిగిన రాళ్ళేన్ని రతనాలైనాయో
ఆ గలగలలెన్ని జీవన జలలైనాయో
ప్రాణ నాడులకు ఊపిరులూదాయో
అలసి సొలసి చివరికి
ప్రియ సన్నిధి చేరుకొన్నది
బిగి కౌగిట ఒదిగొదిగి
ప్రియ బాంధవి తానన్నది //
కామెంట్లు లేవు:
కామెంట్ను పోస్ట్ చేయండి