కవితాంధ్ర

ఓ దేవులపల్లీ
తెలుగు కళామ తల్లి
జడలో విరిసిన సిరిమల్లీ

మళ్లి రావయ్యా మా నడుమకి 
మధుమాసాలు మందహాసాలు
కొని తేవయ్యా ఈ పుడమికి //

మల్లి జాబిల్లి
దారంతా పూవులు చల్లి
ఎదురు చూస్తున్నాయి
నీవు వచ్చే దారుల్లో ..

ఎల కోయిలలన్ని
కొత్త కొత్త గీతాలల్లి
నీ కోసం వెదికినవి
ఈ కొండా కోనల్లో //

పూదేనియ గ్రోలదు
గండు తుమ్మెద
పూదోటను వీడదు
పిల్ల తెమ్మెర

పూలిమ్మని కొమ్మ కొమ్మకు
పురమాయించే దెవరయ్యా
గూడుందని గువ్వల జంటకు
గుర్తు చేసే దెవరయ్యా //

ఓ దేవులపల్లీ !
నీ కోసం పూమాలలు అల్లి
ప్రతి హృదయం
సుమసదన మైనది
నీ పదముల సడి వినాలని
ప్రతి గాలి
మలయమారుతమైనది

రావయ్యా
ప్రభాత కుసుమంలా
రావయ్యా ప్రసూన విభవంలా //

(ప్రఖ్యాత భావకవి దేవులపల్లి కృష్ణ శాస్త్రి గారికి.... భక్తి ప్రపత్తులతో )