కవితాంధ్ర

మనసు అడిగింది ఎలా ఉన్నావని
రాతిరి ఎన్ని స్వప్నాలు కన్నావని

నిదుర రాని నిసిరాతిరి వేళలో
ఆదమరచి ఎన్ని వూసులు విన్నావని

ఎన్నెన్ని రంగు రంగుల స్వప్నాలు
కను రెప్పల మాటున దాచుకున్నావని

నడిరేయి ఒడిలో చేరి అలరించిన
అన్ని అందాలు ఏం చేసుకున్నావని

చెలి చిందించిన మందహాసాలు
ఎన్ని రాసులుగా పోసుకున్నావని

కాలం అడుగుతున్నది అందమైన రేయి
ఎన్ని కవితలు కావ్యాలు రాసుకున్నావని