కవితాంధ్ర

ఏ మనిషిని చూచినా
ఎక్కుపెట్టిన బాణంలా ఉన్నాడు
ఎందుకో మరి చాలీ చాలక
గుక్కపట్టిన ప్రాణంలా ఉన్నాడు
అర్ధంలేని ఆశలతో కంపుకొట్టే అలోచనలతో 
నిషిద్ధగానంలా ఉన్నాడు
తెగిన గాలిపటంలా ఉన్నాడు
ఉవ్వెత్తున ఎగిసిపడిన తరంగంలా ఉన్నాడు
మరణ మృదంగం లా ఉన్నాడు

ఎందుకో ఈ మనిషి
క్షీరసాగర మధనం అనంతరం
అమృతం దొరకని దానవుడిలా ఉన్నాడు
దారుణ మారణానికి సిద్ధం చేసిన
మారణాయుధం ఉన్నాడు

ఎందుకో ఎందుకో
ఈ మనిషి నడుస్తున్న శవంలా ఉన్నాడు
ఊపిరి బిగబట్టి భయం భయంగా ఉన్నాడు
నీరవ నిశీధంలా నిర్వేదంగా నిస్తేజంగా ఉన్నాడు
*****
నిన్న ఒక మనిషిని చూశాను\
ఆశ్చర్యం అనిపించింది
ఒక మనసుని చూశాను
అద్భుతం అనిపించింది
ఎంతకాలానికి
మనిషి రూపం కనిపించింది
ఎన్నాళ్ళకి
ఒక మానవతా గీతం వినిపించింది